Kjo faqe riprodhon pjesët III, IV dhe V të kontratës: politikën e privatësisë, të drejtat tuaja dhe pëlqimet specifike, versioni 1.0.
| Kategoria | Të dhënat | Qëllimi | Baza ligjore |
|---|---|---|---|
| Llogaria | Emri, emaili, fjalëkalimi (vetëm hash) | Krijimi i llogarisë dhe ofrimi i programit | Zbatimi i kontratës |
| Të dhëna shëndetësore (kategori e veçantë) | Mosha, gjatësia, pesha, niveli i aktivitetit, objektivi; 7 pyetje sigurie (shtatzëni, ushqyerje me gji, çrregullim i të ngrënit, sëmundje veshkash, insulinë ose terapi me rrezik hipoglikemie, humbje peshe pa dëshirë, gjendje tjetër); sqarimet dhe vendimet klinike | Vlerësimi i përshtatshmërisë dhe ofrimi i sigurt i programit | Pëlqim i shprehur dhe i veçantë (P2), sipas nenit 2, pika 3, shkronja "e" e Udhëzimit nr. 2/2025 dhe nenit 9 të ligjit |
| Vlerësimi automatik | Përgjigjet e formularit dhe treguesit e llogaritur | Vendimi nëse vazhdoni në pagesë ose kaloni te Dr. Romina; porcioni i propozuar | Pëlqim i shprehur (P3), me të drejtë shqyrtimi njerëzor |
| Blerja dhe fatura | Porosia, shuma, monedha, statusi dhe referenca e pagesës POK, të dhënat e faturës | Pagesa, fatura fiskale, kontabiliteti | Zbatimi i kontratës; detyrim ligjor (fiskal dhe kontabël) |
| Të dhëna teknike | Cookie sesioni, adresa IP, regjistrat e hosting-ut, ngjarje analitike të brendshme pa të dhëna shëndetësore | Siguria, parandalimi i abuzimit, zgjidhja e problemeve | Interes i ligjshëm për sigurinë e platformës |
| Marketingu | Emaili | Lajme dhe oferta nga MIMA | Pëlqim opsional (P6) |
| Dëshmi dhe rezultate | Emri ose inicialet, rezultatet, fotot që zgjidhni të ndani | Publikimi i dëshmisë | Pëlqim opsional (P7), sipas nenit 2, pika 3, shkronja "f" e Udhëzimit |
Të dhënat shëndetësore përdoren vetëm për këto qëllime. Nuk përdoren për marketing, nuk shiten dhe nuk ndahen për reklama. Blerja nuk kushtëzohet me P6 ose P7.
Të dhënat shëndetësore i shqyrton vetëm Dr. Romina, e cila ka detyrimin e sekretit profesional. Stafi administrativ merr vetëm të dhënat e nevojshme për organizim dhe komunikim, është i lidhur me detyrim konfidencialiteti dhe nuk ka akses në vendimet klinike. Këto të dhëna nuk u dërgohen bankës, POK ose EasyPOS.
Në përputhje me nenin 4, pika 4 të Udhëzimit, informacioni shëndetësor shkëmbehet vetëm brenda platformës, me lidhje të enkriptuar. Ju lutemi mos na dërgoni të dhëna shëndetësore me email, WhatsApp ose rrjete sociale.
| Ofruesi | Roli | Të dhënat që merr | Vendndodhja |
|---|---|---|---|
| Render | Hosting i aplikacionit dhe i bazës së të dhënave | Të gjitha të dhënat e platformës, përfshirë ato shëndetësore (të ruajtura) | SHBA (Oregon) |
| Postmark | Dërgimi i email-eve të sistemit (konfirmim llogarie, rivendosje fjalëkalimi, njoftime) | Adresa e email-it, emri dhe përmbajtja e email-it të dërguar. Email-et nuk përmbajnë të dhëna shëndetësore | SHBA |
| POK | Pagesa me kartë | Të dhënat e kartës (futen vetëm te POK), shuma, referenca | Shqipëri |
| EasyPOS | Faturimi fiskal | Artikulli, shuma, data, të dhënat e faturës | Shqipëri |
Këta ofrues veprojnë si përpunues me kontratë dhe vetëm sipas udhëzimeve tona. Të dhënat mund t'u jepen autoriteteve publike vetëm kur ligji e kërkon. Nuk përdorim ofrues analitike ose reklamash.
Serverat e Render dhe të Postmark ndodhen në SHBA. Transferimi kryhet sipas neneve 39–42 të ligjit nr. 124/2024 dhe nenit 11 të Udhëzimit, i mbuluar nga klauzolat standarde kontraktuale në marrëveshjet për përpunimin e të dhënave me këta ofrues. Të dhënat shëndetësore ruhen vetëm te Render dhe nuk i dërgohen Postmark. Për to kërkojmë edhe pëlqimin tuaj të shprehur (P4), pasi informoheni se në SHBA niveli i mbrojtjes mund të mos jetë i njëjtë me atë në Shqipëri dhe BE.
| Kategoria | Afati | Fillon nga |
|---|---|---|
| Fatura dhe të dhënat e pagesës | Sipas ligjit ne fuqi | Fundi i vitit kontabël të blerjes |
| Të dhëna shëndetësore dhe vendime klinike | 3 vjet | Përfundimi i programit |
| Kërkesa të papërfunduara (pa blerje) | 12 muaj | Aktiviteti i fundit |
| Llogaria dhe përmbajtja | Sa është aktive llogaria; fshirje pas 24 muajsh mosaktiviteti, me njoftim paraprak | Kërkesa për fshirje ose aktiviteti i fundit |
| Logjet teknike dhe IP-të | 90 ditë | Krijimi i regjistrit |
| Kopjet rezervë | 30 ditë (cikli i fshirjes) | Krijimi i kopjes |
Kur tërhiqni pëlqimin P2, të dhënat shëndetësore fshihen, përveç një të dhëne minimale që mund të nevojitet për një pretendim të ligjshëm. Pas afatit të dhënat fshihen ose anonimizohen në mënyrë të pakthyeshme.
Fjalëkalimet dhe tokenat e sesionit ruhen vetëm si hash; cookie e sesionit është HttpOnly; lidhja është e enkriptuar (HTTPS); aksesi administrativ është i ndarë sipas roleve dhe regjistrohet kush ka hyrë në të dhëna; bëjmë kopje rezervë. Masat rishikohen periodikisht. Në rast cenimi të të dhënave njoftojmë Komisionerin dhe ju, sipas ligjit. Asnjë sistem nuk garanton siguri absolute.
Përdorim vetëm cookie të nevojshme: mima_session (HttpOnly, SameSite=Lax, 30 ditë) që ju mban të kyçur, dhe një cookie sesioni për stafin. Nuk përdorim cookie reklamash, analitike të palëve të treta ose gjurmues. Çdo teknologji opsionale në të ardhmen do të aktivizohet vetëm me zgjedhjen tuaj.
Sipas ligjit nr. 124/2024 keni të drejtë:
• të informoheni për përpunimin (neni 13) dhe të keni akses e kopje të të dhënave tuaja (neni 14);
• të kërkoni korrigjimin e të dhënave të pasakta ose fshirjen e tyre (nenet 15–16);
• të kërkoni kufizimin e përpunimit (neni 17);
• të merrni të dhënat në format të strukturuar e të lexueshëm dhe t'ia transferoni një kontrolluesi tjetër (neni 18);
• të kundërshtoni përpunimin që mbështetet në interes të ligjshëm (neni 19);
• të mos jeni subjekt i një vendimi vetëm të automatizuar: mund të kërkoni që Dr. Romina ta shqyrtojë vetë rezultatin, të shprehni pikëpamjen tuaj dhe ta kundërshtoni vendimin (neni 20);
• të tërhiqni në çdo kohë çdo pëlqim, po aq lehtë sa e keni dhënë. Tërheqja nuk prek ligjshmërinë e përpunimit të mëparshëm.
Kërkesat dërgohen në mimabydrromina@gmail.com ose nga seksioni "Privatësia" i llogarisë. Verifikojmë identitetin në mënyrë proporcionale dhe përgjigjemi brenda afateve ligjore, pa pagesë. Nëse refuzojmë një kërkesë për korrigjim ose fshirje, ju japim arsyet ligjore me shkrim (neni 6 i Udhëzimit nr. 2/2025).
Tërheqja e P2 ose P3 do të thotë që nuk mund të vlerësojmë më përshtatshmërinë tuaj. Në atë rast programi nuk mund të fillojë ose të vazhdojë me udhëzime të personalizuara; kjo nuk shuan të drejtat tuaja të rimbursimit sipas Nenit 11.
Nëse mendoni se të dhënat tuaja përpunohen në kundërshtim me ligjin, mund t'i drejtoheni Komisionerit për të Drejtën e Informimit dhe Mbrojtjen e të Dhënave Personale, idp.al. Nuk keni nevojë të na kontaktoni më parë dhe nuk humbni aksesin në shërbim për shkak të ankesës.
Shtatë kuti të veçanta shfaqen në momentin kur nevojiten, secila e pashenjuar paraprakisht dhe me tekstin e plotë pranë saj. Asnjë pëlqim nuk fshihet brenda pranimit të kushteve dhe asnjë nuk mund të jepet me një klikim të vetëm për të gjitha.
| Nr. | Ku shfaqet | Për çfarë | E detyrueshme? | Si tërhiqet |
|---|---|---|---|---|
| P1 | Regjistrimi | Pranimi i kontratës dhe deklarata 18+ | Po, për të krijuar llogari | Mbyllja e llogarisë |
| P2 | Para formularit të përshtatshmërisë | Të dhënat shëndetësore | Po, për programin | Llogaria › Privatësia, ose email |
| P3 | Para formularit të përshtatshmërisë | Vlerësimi automatik | Jo: alternativë është shqyrtimi nga Dr. Romina | Llogaria › Privatësia, ose email |
| P4 | Para formularit të përshtatshmërisë | Ruajtja e të dhënave shëndetësore në SHBA | Po, për programin | Llogaria › Privatësia, ose email |
| P5 | Checkout, para butonit të pagesës | Fillimi i menjëhershëm i përmbajtjes digjitale | Po, për akses të menjëhershëm | Nuk tërhiqet pas fillimit të aksesit |
| P6 | Regjistrimi ose llogaria | Marketingu me email | Jo | Lidhja "Çregjistrohu" ose llogaria |
| P7 | Llogaria, pas programit | Publikimi i dëshmisë ose rezultateve | Jo | Llogaria ose email; heqje brenda 7 ditësh |
☐ Kam lexuar dhe pranoj Kushtet e përdorimit dhe blerjes, Politikën e anulimit dhe rimbursimit dhe kam marrë dijeni për Politikën e privatësisë të MIMA by Dr. Romina. Deklaroj se jam mbi 18 vjeç.
Shënim për përdoruesen: kjo kuti nuk përbën pëlqim për të dhënat shëndetësore; ai kërkohet veçmas më poshtë.
☐ Jap pëlqimin tim të shprehur që Romina Selenica (MIMA by Dr. Romina) të mbledhë dhe përpunojë të dhënat e mia shëndetësore: moshën, gjatësinë, peshën, nivelin e aktivitetit, objektivin, përgjigjet për shtatzëninë, ushqyerjen me gji, çrregullimet e të ngrënit, sëmundjet e veshkave, insulinën ose terapitë me rrezik hipoglikemie, humbjen e peshës pa dëshirë dhe gjendje të tjera shëndetësore, si dhe sqarimet që jap gjatë programit, vetëm për të vlerësuar nëse programi RESET 30 është i sigurt për mua dhe për të ma ofruar atë në mënyrë të sigurt.
E di që: të dhënat i shqyrton vetëm Dr. Romina, me detyrim sekreti profesional; ruhen deri në 3 vjet pas përfundimit të programit; nuk përdoren për marketing; mund ta tërheq këtë pëlqim në çdo kohë, por pa to programi nuk mund të fillojë ose të vazhdojë.
☐ Pranoj që përgjigjet e mia të vlerësohen fillimisht nga rregulla automatike, të cilat vendosin nëse mund të vazhdoj menjëherë në pagesë ose nëse kërkesa ime kalon për shqyrtim te Dr. Romina, si dhe propozojnë porcionin tim.
E di që mund të kërkoj në çdo kohë që rezultati të shqyrtohet nga Dr. Romina dhe ta kundërshtoj atë. Nëse nuk e shenj këtë kuti, kërkesa ime shqyrtohet drejtpërdrejt nga Dr. Romina (mund të zgjasë më shumë).
☐ Jap pëlqimin tim të shprehur që të dhënat e mia, përfshirë ato shëndetësore, të ruhen te Render.
Jam informuar se niveli i mbrojtjes së të dhënave në SHBA mund të mos jetë i njëjtë me atë në Shqipëri dhe në BE, dhe se autoritetet mund të kenë akses sipas legjislacionit në fuqi.
☐ Kërkoj shprehimisht që aksesi në përmbajtjen digjitale të "MIMA Reset 30 - Abonim i plotë" të fillojë menjëherë pas pagesës dhe pranoj se, me fillimin e aksesit, humbas të drejtën e tërheqjes nga kontrata për këtë përmbajtje.
E di që kjo nuk prek të drejtat e mia për shërbim të papërmbushur ose me mangësi, për pagesa të dyfishta ose për ndalimin e programit për arsye sigurie. Konfirmimi i këtij pëlqimi më dërgohet me email bashkë me konfirmimin e porosisë. Butoni i pagesës aktivizohet vetëm pasi shenjohet kjo kuti.
☐ Dëshiroj të marr me email lajme, receta dhe oferta nga MIMA by Dr. Romina.
Nuk përdoren të dhëna shëndetësore për këto email-e. Çdo email ka lidhjen "Çregjistrohu". Blerja nuk varet nga kjo zgjedhje.
☐ Jap pëlqimin që MIMA by Dr. Romina të publikojë në faqen e saj dhe në rrjetet sociale dëshminë time dhe rezultatet që zgjedh të ndaj, në formën që shenjoj më poshtë:
○ Pa emër (anonim)
○ Me inicialet
○ Me emrin dhe foto
E di që kjo bën publike të dhëna që lidhen me shëndetin tim, se mund ta tërheq pëlqimin në çdo kohë dhe se publikimi hiqet nga kanalet e MIMA brenda 7 ditëve nga kërkesa. Para çdo publikimi më dërgohet teksti ose fotoja për miratim.
Regjistri i pëlqimeve. Për çdo kuti ruhen data, ora, versioni i tekstit dhe veprimi (dhënie ose tërheqje). Te Llogaria › Privatësia shihni në çdo kohë cilat pëlqime keni dhënë dhe i tërhiqni me një klikim.